In Florence het jy heelwat vrye tyd en tussenin stap ons saam met ons gids, Vincenzo, deur die oudste dele van die stad met verstommende stories oor die wat waar en hoe. Ons eindig by die Academia-museum waar Dawid reeds baie dekades in sy marmernaaktheid staan en poseer.   Om te dink Michael Angelo was maar 26 jaar oud toe hy in 1501 opdrag ontvang het om die 5.17 meterhoë standbeeld te skep. En as jy wil, gaan kuier jy by Mercato Centrale vir ‘n lekker kos-kuier. Jy kan jou ook by die Leonardo da Vinci Museum gaan verstom aan sy ontwerpe en uitvindsels wat sy tyd eeue vooruitgeloop het… 

Daarna nog ‘n hoogtepunt – Twee dae in Cinque Terre, wat deur baie beskou word as een van die mees besondere en skilderagtige gebiede van Italië…met sy vyf (cinque) kleurvolle dorpies wat soos swaeltjieneste bo die see hang…    

Daarna gaan pak ons vir vier dae tasse uit in die pragtige San Gimignano. Van daar af besoek ons elke dag ‘n heuweldorpie of twee en geniet ‘n skitterende halfdag Italiaanse kook-ervaring op die wynlandgoed, Guardastelle. By die skilderagtige Montefiorale gaan ons wyn proe voordat ons, soos byna elke aand in San Gimignano, op die plein op die put se trappies gaan sit en ‘n egte Gelato verorber…en miskien is daar weer vanaand ‘n straatmusikant wat hom of haar op die plein tuismaak.

Op pad na Napels een dag vrye tyd in Rome. Ons bly twee nagte in Napels en besoek die geskiedkundige rampgebied van Pompeї. Ons bus neem jou tot in die omgewing van die unieke Amalfi- en Positano-gebied waar jy in eie tyd gebruik kan maak van openbare vervoer.

Maar om alles wat voorlê te probeer beskryf is ‘n onbegonne taak…. Want hoe beskryf mens die lekkerste kuier, lekker eet en drinkgoed, die emosionele gevoel van iets wat jy vir altyd probeer vasvang, en nuwe ervarings wat spruit uit eeue-oue geboue en gebeure?

Ons sien jou in Italië.

Marius du Plooy
Toerleier:

Skakel my by:
Cell: 083 787 1234
E-pos: marius@fundipro.co.za