Ons vlieg tot in Bologna en per bus na ons hotel in Florence.

In Florence stap ons saam met ons gids, Vincenzo, deur die oudste dele van die stad met verstommende stories oor die wat waar en hoe. Ons eindig by die Academia-museum waar Dawid reeds baie dekades in sy marmernaaktheid staan en poseer.   Om te dink Michael Angelo was maar 26 jaar oud toe hy in 1501 opdrag ontvang het om die 5.17 meterhoë standbeeld te skep. Daar is meer as genoeg vrye tyd om te doen wat jy graag wil. 

Dan nog ‘n hoogtepunt – Twee dae in die ongelooflik-mooie Cinque Terre, wat deur baie beskou word as een van die mees besondere en skilderagtige gebiede van Italië…met sy vyf (cinque) kleurvolle dorpies wat soos swaeltjieneste bo die see hang…    

Na Cinque Terre besoek ons Lucca en Pisa en pak dan ons tasse vir 4 dae uit in die pragtige San Gimignano. Van daar af besoek ons elke dag ‘n heuweldorpie of twee en geniet ‘n halfdag Italiaanse kook-ervaring op die wynlandgoed, Guardastelle. By die skilderagtige Montefiorale gaan ons wyn proe voordat ons dalk, soos byna elke aand in San Gimignano, op die plein se put-trappies gaan sit en ‘n egte Gelato verorber. 

En net miskien, is daar vanaand weer een van daai straatmusikante wat spesiale klankkleur gee aan die eeue-oue, grysbruin geboue van San Gimignano. 

Oppad na Napels stop ons vir ‘n paar uur se vrye tyd in Rome. Die volgende dae besoek ook die geskiedkundige rampgebied van Pompeii, die unieke Amalfi-omgewing en Positano.

Maar om alles wat voorlê te probeer beskryf is ‘n onbegonne taak…. Want hoe beskryf mens die lekkerste lekker eet- en drinkgoed, die emosionele gevoel van iets wat jy vir altyd en altyd wil vasvang, nuwe ervarings wat spruit uit nuwe vriendskappe, eeue-oue geboue en gebeure…?

Ons sien jou in Italië.